Pasobra nos ta tene kuenta ku otro

Felisidat bo no por ekspresá den sèn. Pero si MiVaBo logra hasi bida di un kompatriota minusválido mas konfortabel, nos ta garantisá bo ku e lo bira mas felis dor di esei. Kiko esei lo a kosta, e yudansa di MiVaBo?

Si bo sostené MiVaBo, bo ta sostené masha hopi Boneriano: tur hende ku tin kualke limitashon i ku por haña yudansa pa esaki. Ponementu di un bòrchi di stashonamentu pa esnan desabilitá, legislashon pa aksesibilidat di edifisionan públiko, bis’é ku e tin derechi riba un medio grátis. Ta kosta hopi sèn pa sòru pa tur esaki.

Kon bo por yuda MiVaBo hasi su trabou?

• Duna sèn: kada dòler ta bonbiní. Nos ta kontentu ku spònser grandi i chikitu.
  Klek aki si bo ke sostené nos finansieramente. Masha danki!
• Spònser in natura: pone un sala di reunion disponibel, prent nos foyeto pòrnada. Klek aki i bisa nos kiko bo tin di ofresé. Tremendo!
• Yudansa personal: registrá bo mes komo boluntario. Nos ta buska tur sorto di disiplina manera un hende pa traha kòfi, un traduktor òf un atministradó di ret. Klek aki i bisa nos kiko bo por i kiko bo ke. Te aki ratu!

Unda e sèn di spònser ta bai?

MiVaBo ta lòbi ku gobièrnu i komersio i ta tene kampañanan di informashon pa tantu Bonerianonan válido komo minusválido. Na esei e sèn ta bai. E sèn no ta bai pa personanan individual. Loke por sosodé sí ta ku MiVaBo ta skohe pa sostené un otro organisashon sosial si esei ta kuadra ku su ophetivonan. I resultado di tur e trabou aki ta naturalmente pa tur habitantenan di e isla!

E gastunan di e lòbimentu i e aktividatnan di relashonnan públiko ta konsistí prinsipalmente di papel, enk, pòst, telefon, gasolin, foyeto, steker, software i lokalidatnan pa tene konferensha. Un parti di e gastunan aki ta wòrdu kubrí te ainda dor di e voluntarionan mes. Nan no ta haña ningun kompensashon pa nan papel, telefon i gasolin. Tampoko pa nan tempu. Esei no ta nada. Pero nan no por karga e gastunan di impreso di 500 foyeto, reservashon di un sala di konferensha òf 60 bia 2 kòpi di kòfi, 3 glas di limonada i 2 pan.

Danki Dios hopi empresa lokal ta dispuesto pa pone de todo grátis disponibel pa MiVaBo, te na nan personal. Pero esei no por sosodé semper i pa tur kos. P’esei nos tin mester di kèsh tambe.

Kon nos ta duna kuenta i rason?

MiVaBo ta un fundashon i ta inskribí na Kámara di Komersio na Boneiru. E organisashon pues ta un persona hurídiko ofisial i ta traha un kuenta anual. Akiden tur suma ku drenta i keda saká atrobe ta keda prosesá. Huntu ku e kuenta anual aki nos ta skirbi un relato anual tambe, den kua tur sifra ta keda aklará ampliamente.

Durante aña bo por sigui e aktividatnan i okupashonnan di MiVaBo riba e wèpsait aki. Banda di esei bo ta lesa, tende i mira via prensa lokal kiko nos ta hasi entre otro.

Asina bo sa sigur ku bo sèn ta wòrdu bon usá.